ഏറ്റവും വില കുറഞ്ഞ 200 സിസി ബൈക്ക്; ഹീറോ എക്‌സ്ട്രീം 200R എത്തി

200 സിസി ശ്രേണിയില്‍ ഹീറോയുടെ പുതിയ പരീക്ഷണമായ എക്സ്ട്രീം 200R ഇനി ഇന്ത്യയിലുടനീളം ലഭ്യമാകും. നേരത്തെ പശ്ചിമബംഗാള്‍, അസം, ത്രിപുര, മിസോറാം എന്നീ സംസ്ഥാനങ്ങളില്‍ മാത്രമാണ് എക്‌സ്ട്രീം 200R ലഭ്യമായിരുന്നത്. 89,000 രൂപയാണ് വാഹനത്തിന്റെ ഡല്‍ഹി എക്‌സ്‌ഷോറൂം വില. അടുത്ത ആഴ്ച മുതല്‍ ഫാക്ടറയില്‍നിന്ന് രാജ്യത്തെ രാജ്യത്തെ എല്ലാ ഡീലര്‍ഷിപ്പുകളിലേക്കും വാഹനം എത്തിത്തുടങ്ങും. ഇന്ത്യന്‍ വിപണിയില്‍ 200 സിസി ശ്രേണിയില്‍ ഏറ്റവും വില കുറഞ്ഞ ബൈക്കാണിത്.

പഴയ എക്‌സ്ട്രീം സ്‌പോര്‍ട്‌സില്‍ നിന്ന് വ്യത്യസ്തമായി കൂടുതല്‍ കരുത്തുറ്റ 200 സിസി എന്‍ജിനാണ് എക്സ്ട്രീം 200 ആറിനുള്ളത്. എന്‍ജിന് പുറമേ ബോഡി ഡിസൈനിലും കാതലായ മാറ്റങ്ങളുണ്ട്. 2016 ഡല്‍ഹി ഓട്ടോ എക്സ്പോയില്‍ കണ്‍സെപ്റ്റ് അവതരിപ്പിച്ച ശേഷം ഇക്കഴിഞ്ഞ ഡല്‍ഹി ഓട്ടോ എക്സ്പോയിലാണ് എക്സ്ട്രീം 200R കമ്പനി ആദ്യമായി അവതരിപ്പിച്ചിരുന്നത്.

സ്‌പോര്‍ട്ടി രൂപത്തിന് മുന്‍ഗണന നല്‍കിയാണ് വാഹനത്തിന്റെ ഡിസൈന്‍. പുതിയ 199.6 സിസി എയര്‍കൂള്‍ഡ് സിംഗിള്‍ സിലിണ്ടര്‍ എന്‍ജിന്‍ 8000 ആര്‍പിഎമ്മില്‍ 18.4 പിഎസ് പവറും 6500 ആര്‍പിഎമ്മില്‍ 17.1 എന്‍എം ടോര്‍ക്കുമേകും. 5 സ്പീഡാണ് ട്രാന്‍സ്മിഷന്‍. 200 സിസി നിരയില്‍ ബജാജ് പള്‍സര്‍ NS200, ടിവിഎസ് അപ്പാച്ചെ RTR 2004V എന്നിവരാണ് പുതിയ എക്സ്ട്രീമിനെ കാത്തിരിക്കുന്ന എതിരാളികള്‍.

അധിക സുരക്ഷ നല്‍കാന്‍ ഓപ്ഷണലായി എബിഎസ് (ആന്റി-ലോക്ക് ബ്രേക്കിങ് സിസ്റ്റം) സംവിധാനവും ഉള്‍പ്പെടുത്തിയിട്ടുണ്ട്. മുന്‍ഭാഗത്തുള്ള എയര്‍ വെന്റ്സ്, എല്‍ഇഡി പൈലറ്റ് ലൈറ്റോടുകൂടിയ മോണോ ഹാലജന്‍ ഹെഡ്ലാംമ്പ്, എല്‍ഇഡി ടെയില്‍ ലാംമ്പ്, ഡ്യുവല്‍ ടോണ്‍ സീറ്റ്, മള്‍ട്ടി സ്പോക്ക് 17 ഇഞ്ച് വീല്‍, അനലോഗ് ഡിജിറ്റല്‍ ഇന്‍സ്ട്രുമെന്റ് കണ്‍സോള്‍ എന്നിവയാണ് 200 സിസി എക്സ്ട്രീമിന്റെ പ്രധാന സവിശേഷതകള്‍.

2062 എംഎം നീളവും 778 എംഎം വീതിയും 1072 എംഎം ഉയരവും 1338 എംഎം വീല്‍ബേസും 795 എംഎം സീറ്റ് ഹൈറ്റുമാണ്‌ വാഹനത്തിനുള്ളത്. ഭാരം 148 കിലോഗ്രാം. 12.5 ലിറ്ററാണ് ഫ്യുവല്‍ ടാങ്ക് കപ്പാസിറ്റി. മണിക്കൂറില്‍ പരമാവധി 114 കിലോമീറ്ററാണ് വേഗത. 4.6 സെക്കന്‍ഡില്‍ പൂജ്യത്തില്‍ നിന്ന് 60 കിലോമീറ്റര്‍ വേഗം കൈവരിക്കാനും സാധിക്കും.